2014-12-09

Рӧштво матын

Регыд матысмӧ тшупӧда лун – Вежа Рӧштво. Эскысьяс ми али абу, олӧмас тайӧ луныс пырӧма-йиджӧма Ӧд Кристослӧн чужан лунсянь ставӧн арталам мувывса кад.

Кутшӧм удж бертӧма Кристос, мый Сы серти артавсьӧ олӧмыс? Коркӧ мӧвпыштлін-ӧ та йылысь тэ? Коді тэныд тайӧ Мортыс? Кутшӧм инын тэнад сьӧлӧмад да олӧмад Сійӧ? 

Уналӧн Рӧштво – тайӧ мичмӧдӧм веж коз, бур козинъяс, гажа лунъяс да сідз водзӧ. А мый подулас? Эг-ӧ ми воштӧй тайӧ лунлысь ина помкасӧ асланым пессигӧн-мырсигӧн? 

Сувтлыштлы недыр кад кежлӧ, видзӧдлы ас гӧгӧрыд...

2014-11-17

Енпӧв

Выльлун, вӧльгым 17 лун... 

Кор ме дорӧ волӧны да и вичкоӧ пыравлӧны, пыр шензьӧны сыӧ, мый миянлӧн эмӧсь... енпӧвъяс. Нинӧм таын шемӧсмӧданаыс абу, ӧд ми ог кевмысьӧй-юрбитӧй серпасалӧмтор вылӧ.. Ми гӧгӧрвоам миянӧс кытшалысь муюгыдсӧ син пыр, пель пыр (кывзӧмӧн), кималас пыр, нырислун пыр... 

Енпӧв пыр ми видлам неуна гӧгӧрвоны и Енмӧс. Тшӧтшкӧ, тайӧ некыдзи оз веж Сійӧс Асьсӧ ...  Сідз жӧ, кыдзи оз веж медся матысса мортлӧн югӧрпасыс асьсӧ мортсӧ...         

2014-11-14

Енэжвывса Айным

"Енэжвывса Айным... " 

Тадзи пансьӧ Кристосӧ эскысьяслӧн медыджыд кевмысьӧмыс... Ме куті ачым гӧгӧрвоны тайӧ кывъяссӧ сӧмын сэки, кор вуджӧдім "Отче нашсӧ" коми вылӧ... 

Ен, кыдзи мувывса айӧ (бать)...Кӧть кутшӧм ме эг вӧв ачым, ме пыр зіля корсьны менам айӧын сӧмын буртор, шензя сылӧн кутчысьӧм (терпенньӧ) вылын, кужанлун да сямлун вылын... 

Кыдзи сійӧ вермӧ артыштны уна воськов вылӧ водзӧ быд лоӧмторсӧ... Сӧмын сьӧкыда ышловзяс, сӧмын бур вылӧ напӧдас-велӧдас... 

Ме дӧзма, а бӧрыннас казяла, мый сы серти тай и артмӧ... Пыр виччысьӧ, лача кутӧ, мый вола. А меным пыр некор, пыр кутшӧмкӧ эштытӧм удж уджала. А быд волӧм вермас лоны медбӧръя...

Енэжвывса Айным, ме ӧні куті неуна гӧгӧрвоны Тэнӧ... Мылышты менӧ…

2014-11-13

Ӧткалун

Ӧткалун... 

 

Колян тӧлысь помын миян вичкоын (Евангелльӧ серти лютэраналӧн Пыртысь вежа Иёан нима Сыктывкарса вичкоув) муніс кык лунъя велӧдӧм. Сёрнитанторнас вӧлі мортлӧн ӧткалун... 

 

Кытысь сійӧ босьтсьӧ, кыдзи йирӧ мортсӧ пытшкӧссяньыс, увтыртӧ-нартитӧ сійӧс. Чукӧрмыліс матӧ комын морт. И велӧдӧмсӧ нуӧдігӧн петкӧдчис, мый унджыкыс на пиысь... висьӧны ӧткалунӧн. Ми гӧгӧр йӧз, ми асьным волысям унакӧд, а збыль вылас пытшкӧсаным шуштӧм, тог...  


Лоам жӧ сибыдӧсь ӧта-мӧд дінӧ, кӧть тайӧ абу кокни. Велӧдчам лоны мортӧн...

Медводдза гижӧд

Дона коми войтыр! 

Сьӧлӧмсянь чолӧмалам Тіянӧс выль блогын!

Видза корам пыравлыны миян дорӧ!